କେତେ ସ୍ବାଧିନ ଆମ ଗଣମାଧ୍ୟମ

ଦ କୁଇଭର ବ୍ୟୁରୋ :- ଆଜି ସାରା ବିଶ୍ୱ ପାଳୁଛି ଅନ୍ତର୍ଜାତୀୟ ପ୍ରେସ ସ୍ବାଧିନତା ଦିବସ। ତେବେ ଗଣତନ୍ତ୍ରର ଚତୁର୍ଥ ସ୍ତମ୍ଭ କୁହାଯାଉଥିବା ଗଣମାଧ୍ୟମ ସତରେ କଣ ସ୍ୱାଧୀନ ନା ଗଣମାଧ୍ୟମ ହାତରେ ପଡିଛି ବେଡି? ପ୍ରଗତିଶୀଳ ବିଶ୍ବ ପାଇଁ ଗଣମାଧ୍ୟମ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଥିବା କୁହାଯାଉଥିବା ବେଳେ ଶିକାର ହୋଇଥାଏ ରାଜନୀତି ନାମକ ଭୁତାଣୁ ଦ୍ୱାରା। ଗୋଟିଏ ପକ୍ଷରେ ସାମାଜିକ, ସାଂସ୍କୃତିକ, ରାଜନୈତିକ, ଅର୍ଥନୈତିକ ତଥା ବୈଜ୍ଞାନିକ ସ୍ଥିତି ସମ୍ପର୍କରେ ସୂଚନା ଦେବା ପାଇଁ ଗଣମାଧ୍ୟମ ହିଁ ସର୍ବଶ୍ରେଷ୍ଠ କୁହାଯାଉଥିବା ବେଳେ ଅନ୍ୟ ପକ୍ଷରେ ଏହି ରାଜନୀତି ହିଁ ସାମ୍ବାଦିକତାର ସ୍ୱାଧୀନତାକୁ ତଣ୍ଟି ଚିପି ରଖିଥାଏ। ପୂର୍ବରୁ ସାମ୍ବାଦିକତାକୁ ଏକ ବିପଦପୂର୍ଣ୍ଣ ବୃତ୍ତି ବୋଲି ବିବେଚନା କରାଯାଉଥିବା ବେଳେ ଏବେ କିନ୍ତୁ ସାମ୍ବାଦିକ ବିପଦରେ। ଯିଏ ନେତା ମନ୍ତ୍ରୀଙ୍କ ପାଦ ଧରିଲା ସିଏ ହେଲା ସୁରକ୍ଷିତ ଆଉ ଯିଏ ଅନ୍ୟାୟ ଅନୀତି ବିରୁଦ୍ଧରେ ସ୍ୱର ଉଠେଇଲା ସେ ହେଲା ଆକ୍ରମଣର ଶିକାର| ଆଉ ଯାହାର ସ୍ୱର ସୌଭାଗ୍ୟବଶତଃ ଲୋକଲୋଚନକୁ ଆସିଗଲା ସେ ହେଲା ସମାଜ ପାଇଁ କର୍ମକ୍ଷେତ୍ରରେ ଶହୀଦ| ତାହେଲେ ଏଠି ପ୍ରଶ୍ନ ଉଠୁଛି ଯଦି ପ୍ରେସ ବା ସାମ୍ବାଦିକର ସ୍ୱାଧୀନତା ନାହିଁ ତେବେ ୟାକୁ ନେଇ ଏ ଦିବସ ଆସିଲା କେଉଁଠୁ? ଖାଲି ବର୍ଷ ସାରରେ ଗୋଟିଏ ଦିନ ପାଳନ କଲେ ହୁଏ ନାହିଁ ବରଂ ଏ ଦିଗରେ କିଛି ପଦକ୍ଷେପ ନେଇ ପାରିଲେ ଯାଇ ସତସତିକା ଏହି ଦିବସର କିଛି ଯଥାର୍ଥତା ରୁହନ୍ତା।ବାକ୍ ସ୍ବାଧିନତା ଅଧିକାରର ରକ୍ଷା ଏବଂ ସମ୍ମାନ ସରକାରଙ୍କ କର୍ତ୍ତବ୍ୟ ହୋଇଥିବା ବେଳେ ସାରା ବିଶ୍ବରେ ପ୍ରତିଦିନ ସାମ୍ବାଦିକଙ୍କ ଉପରେ ଆକ୍ରମଣ ହେଉଥିବା ଖବର ସାମ୍ନାକୁ ଆସୁଛି । ପ୍ରତିବର୍ଷ ମେ ୩ ତାରିଖରେ ବିଶ୍ବ ପ୍ରେସ ସ୍ବାଧୀନତା ଦିବସ ପାଳିତ ହେଉଥିବା ବେଳେ ଏହି ଦିନର ଉଦ୍ଦେଶ୍ୟ ହୋଇଥାଏ ଗଣମାଧ୍ୟମର ସ୍ୱାଧୀନତାର ନୀତି ପାଳନ କରିବା, ଗଣମାଧ୍ୟମର ମୂଲ୍ୟାଙ୍କନ କରିବା ଏବଂ ଆକ୍ରମଣରୁ ରକ୍ଷା କରିବା ଏବଂ କାର୍ଯ୍ୟ କରିବା ସମୟରେ ଜୀବନ ହରାଇଥିବା ସାମ୍ବାଦିକମାନଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିବା। କିନ୍ତୁ ଆଜିକାଲି ସତ୍ୟତା ପରିବେଷଣ ବେଳେ ହିଂସା, ବର୍ବରୋଚିତ କାଣ୍ଡରେ ନିଷ୍ପେଷିତର ଶିକାର ହେବାକୁ ପଡୁଛି ସାମ୍ବାଦିକ ମାନଙ୍କୁ। ସମାଜର ଚତୁର୍ଥସ୍ତମ୍ଭ କୁହାଯାଉଥିବା ଗଣମାଧ୍ୟମର ସ୍ବାଧୀନତା ଉପରେ ବାରମ୍ବାର ଆକ୍ରମଣ ହେଉଛି । ସତ କହିଲେ ମିଳୁଛି ଦଣ୍ଡ। 'ଗଣମାଧ୍ୟମ' ଏକ ଶବ୍ଦ ନୁହେଁ ବରଂ ଏହା ଏକ କର୍ତ୍ତବ୍ୟ ବୋଲି ବୋଧହୁଏ କିଛି ଲାଞ୍ଚୁଆ ସାମ୍ବାଦିକ ଆଉ କିଛି ଗଣତନ୍ତ୍ର ନାମରେ ଚଳାଉଥିବା ରାଜତନ୍ତ୍ରବାଦୀ ଶାସକ ମାନେ ଭୁଲିଗଲେଣି। ସେଥିପାଇଁ ବାରମ୍ବାର ଚତୁର୍ଥସ୍ତମ୍ଭର ସ୍ବାଧିନତା ଉପରେ ଆକ୍ରମଣ ହେଉଛି। ଗଣମାଧ୍ୟମ ଓ ସାମ୍ବାଦିକଙ୍କ ସୁରକ୍ଷାକୁ ନେଇ ଅନେକ ନିୟମ ପ୍ରଣୟନ ହୋଇଥିଲେ ମଧ୍ୟ ଆଜି ମଧ୍ୟ ଏହା ମୂଳ ସ୍ବାଧିନତା ବାଟକୁ ଚାହିଁ ବସିଛି । ଉଲ୍ଲେଖନୀୟ ଯେ, ୧୯୯୧ରେ ୟୁନେସ୍କୋ ସାଧାରଣ ସମ୍ମିଳନୀର ସୁପାରିଶ ପରେ ମିଳିତ ଜାତିସଂଘର ସାଧାରଣ ସଭା ଦ୍ବାରା ୧୯୯୩ ମସିହାରେ ବିଶ୍ବ ପ୍ରେସ ସ୍ବାଧୀନତା ଦିବସ ପ୍ରତିଷ୍ଠା କରାଯାଇଥିଲା । ଏହାପରେ ୧୯୯୪ ମସିହାରେ ପ୍ରଥମ ଥର ପାଇଁ ପାଳନ କରାଯାଇଥିଲା । ତେବେ ଏହି ଦିବସ ପାଳନ ପାଇଁ ପ୍ରତ୍ୟେକ ବର୍ଷ ଏକ ନୂଆ ଥିମ ରହିଥିବା ବେଳେ ୨୦୨୨ ଚଳିତ ବର୍ଷର ଥିମ ରହିଛି ପୃଥିବୀ ପାଇଁ ପ୍ରେସ: ପରିବେଶ ସଙ୍କଟ ସାମ୍ନାରେ ସାମ୍ବାଦିକତା A Press for the Planet: Journalism in the Face of the Environmental Crisis।