ବ୍ୟବସାୟୀଙ୍କୁ ଗୁଳି କରି ହୀରା ପଥର ଲୁଟ ଘଟଣା

ବ୍ରହ୍ମପୁର( ଦ କୁଇଭର ):- ସ୍ଥାନୀୟ ଶାସ୍ତ୍ରୀନଗରର ହୀରା ବ୍ୟବସାୟୀ ଏସ୍. ବାଲକ୍ରିଷ୍ଣା ଆଚାରୀ ଓରଫ ରୁନା ଏବଂ ତାଙ୍କ ପୁତୁରା ସୁନୀଲ କୁମାର ସାହୁଙ୍କୁ ଗୁଳିମାଡ଼ କରି ହୀରାପଥର ଲୁଟ୍ ଘଟଣାରେ ପୁଲିସ ଘଟଣାର ମାଷ୍ଟରମାଇଣ୍ଡ ମଳୟଙ୍କ ସହ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ନିକଟରୁ ଘଟଣାରେ ବ୍ୟବହୃତ କାର୍, ଗୁଳି ଓ ମୋବାଇଲ ଜବତ କରିଛି। ଏହି ଘଟଣାର ମାଷ୍ଟରମାଇଣ୍ଡ ଆସିକା ନିକଟ କୋଟିନଡ଼ା ଥାନା ଅନ୍ତର୍ଗତ ଭେଟନଇ ପନ୍ଦରାସାହିର ଅରୁଣ କୁମାର ଉପାଧ୍ୟାୟ ଓରଫ ମଳୟ(୫୦) ବୋଲି ପୁଲିସ ସ୍ପଷ୍ଟ କରିଛି। ପୁଲିସ ମଳୟ ସମେତ ଭୁବନେଶ୍ଵର ଖଣ୍ଡଗିରି ଥାନା ଅନ୍ତର୍ଗତ ବେଗୁନିଆ ମସଜିଦ୍ ନିକଟ ଗୋଲଡେନ୍ ସୋସାଇଟିର ସରୋଜ କୁମାର ମହାନ୍ତି(୫୯), ଯଦୁପୁର ମାଦ୍ରାସ୍ ମସଜିଦ୍ ଅଞ୍ଚଳର ଶେଖ୍ ରାଜୁ(୨୩) ଓ ସାହିଲ୍‌ ଖାନ୍(୨୧)କୁ ଗିରଫ କରିଛି। ଅଭିଯୁକ୍ତମାନେ ଦୁବାଇର ହୀରା ବ୍ୟବସାୟୀ ବୋଲି ପରିଚୟ ଦେଇ ସେଭଳି ପୋଷାକ ପିନ୍ଧି ରୁନାଙ୍କ ଘରକୁ ଆସିବା ପରେ ଗୁଳିମାଡ଼ କରି ଲୁଟ୍ କରିବା ପରେ ଫେରାର ହୋଇଯାଇଥିଲେ ବୋଲି ବ୍ରହ୍ମପୁର ଏସ୍.ପି ଡା.ଶ୍ରବଣା ବିବେକ.ଏମ୍ ସୂଚନା ଦେଇଛନ୍ତି । ଅଭିଯୁକ୍ତଙ୍କ ନିକଟରୁ ପୁଲିସ ଏକ କାର୍, ୩ଟି ମୋବାଇଲ, ୨ଟି ଗୁଳି ଓ କ୍ୟାଟ୍ରିଜ୍ ଜବତ କରିଛି। ମିଳିଥିବା ସୂଚନା ଅନୁଯାୟୀ, ଶାସ୍ତ୍ରୀନଗର ୫ମ ଲାଇନ୍‌ର ରୁନା ଆଚାରୀ ବିଶାଖାପାଟଣାର ଜଣେ ମୂଲ୍ୟବାନ ପଥର ଓ ହୀରା ବ୍ୟବସାୟୀ। ମୁଖ୍ୟ ଅଭିଯୁକ୍ତ ତଥା ମୂଲ୍ୟବାନ ପଥର ବ୍ୟବସାୟରେ ଦଲାଲ ଭାବେ କାର୍ଯ୍ୟ କରୁଥିବା ମଳୟ ସହ ପୂର୍ବରୁ ରୁନାଙ୍କ ବ୍ୟବସାୟିକ ସମ୍ପର୍କ ରହିଥିଲା । ପ୍ରେମ କୁମାର ନାମକ ଜଣେ ରତ୍ନପଥର ବ୍ୟବସାୟୀଙ୍କ ନିକଟରେ ୯.୯୬ କ୍ୟାରେଟ୍‌ର ଏକ ମୂଲ୍ୟବାନ ପଥର ରହିଥିବା ରୁନା ଆଚାରୀ ଜାଣିବାକୁ ପାଇଥିଲେ। ଅଭିଯୁକ୍ତ ମଳୟଙ୍କ ଜରିଆରେ ସେ ଉକ୍ତ ମୂଲ୍ୟବାନ ପଥର କିଣିବାକୁ ଚାହିଁଥିଲେ। ଏହାପରେ ଅଭିଯୁକ୍ତ ମଳୟ ଓ ଉପରୋକ୍ତ ୩ ଅଭିଯୁକ୍ତ ମିଶି ପ୍ରେମ କୁମାରଙ୍କ ଠାରୁ ଉକ୍ତ ମୂଲ୍ୟବାନ ପଥର ଲୁଟ୍ ପାଇଁ ଯୋଜନା କରିଥିଲେ। ରୁନା ଏବଂ ମଳୟଙ୍କ କହିବା ପ୍ରକାରେ ବିଶାଖାପାଟଣାରୁ ପ୍ରେମ କୁମାର ଭୁବନେଶ୍ଵରକୁ ଆସିଥିଲେ| ସେଠାରେ ଡିଲ୍ ହୋଇନପାରିବାରୁ ଗୁନା ଓ ପ୍ରେମ କୁମାର ବ୍ରହ୍ମପୁର ଚାଲି ଆସିଥିଲେ | ଘଟଣାଦିନ ଅଭିଯୁକ୍ତମାନେ ବ୍ରହ୍ମପୁରକୁ ଆସି ଦୁବାଇର ଜଣେ ବ୍ୟବସାୟୀ ଆସିଥିବା କହି ରୁନାଙ୍କ ଘରେ ପହଞ୍ଚି ଉକ୍ତ ଅଳଙ୍କାର ଲୁଟ କରି ନେଇ ଯାଇଥିଲେ। ରୁନା ପ୍ରତିବାଦ କରିବାରୁ ସେମାନେ ଗୁଳିମାଡ଼ କରିଥିବା ପୁଲିସ ତଦନ୍ତରୁ ଜାଣିବାକୁ ପାଇଛି।